Nan zòn baryè boutèy presizeman Labori ki twouve l sou wout nasyonal nimewo 1 an, nan antre sid vil Okap gen yon gwo dram ki pase nan devan jou 2 me 2024 la. Kote plizyè kay efondre sa ki lakoz gen pou piti yon dizèn moun ki pèdi lavi yo se bilan pasyèl sa otorite yo nan vil Okap bay Laprès.

Depi fen mwa avril la, anpil lapli pa sispann vide nan vil Okap ak zòn ki antoure l yo. Sa ki pèmèt plizyè site ki twouve yo nan dezyèm vil peyi a inonde. Ayè mèkredi a, lapli a te kòmanse tonbe depi nan 4è aprè midi sa ki koz fwa tradisyonèl premye me ki te genyen sou plas Notre Dame ri 18 la ak sou boulva vil la pa fini byen. Anpil machann te plenyen anpil pou pè yo fè e te montre mekontantman yo akoz sa. Lapli sa ki pa t janm kanpe pandan lannuit lan ta pral fè gwo dega avan bajou kase jodi 2 me 2024.

^{Foto mòn Labori pandan Popilasyon an tap fè tantativ pou retire kadav yo anba dekonb}

« se pa paske nou pa t santi yon wòch te ka woule, li te ka toujou woule. Men nou pa t panse se konsa tout bagay sa yo te ka pase », sa se deklarasyon yonn nan fanmi viktim yo ki t ap pale ak anpil dezolasyon. Li avanse pou l eksplike te gen yon fanmi (4 fi, 3 gason), ki t ap viv nan menm kay ki anba dekonb.

Anpil moun leve ak gwo rèl maten an akoz dram sa ki mete dlo nan je lakay anpil fanmi. Plizyè moun nan sosyete sivil la te pote boure pou bay èd yo nan fason yo kapab. Se jis bò 11è nan maten otorite nan vil Okap yo te kòmanse ap parèt tèt yo timidman.

_{Foto yon Dam ki genyen Moun li Anba dakonb}

« Se avèk anpil nostalji m ap asiste ak yon bagay ki te previzib. Se pa jodia ak ayè otorite nan vil la ap fè pledwari pou tèt sa mòn sa pa okipe ak kantite kay sa yo », se sa Delege vil Okap la Pierrot Degault Augustin deklare nan mikwo Mako Love. Li  pwofite voye senpati l, li prete vwa konsèy prezidansyèl la pou l voye senpati l tou.

^{Edwardo PIERRE}

^{E-mail :journalisteedwardopierre@gmail.com}

Crédit photo : MakoLove