Depi kèk tan, lè lapli tonbe nan vil Okap sa toujou koze plizyè zòn inonde e sitiyasyon an konn vin pi mal lè dlo a chita pa koule nan kanal yo akoz fatra yo konn jete nan yo. Asosiyasyon jèn dinamik nan Petitans (AJDP)/(Lobeda), yon seksyon kominal ki twouve l Okap pran inisyativ kote plizyè jèn fi ak gason mete tèt ansanm san okenn konplèks pou yo kapab netwaye kanal ki nan zòn pa yo. Jounen kite samedi 30 mas ki sot pase a ekip #MakoLove, te rann yo vizit nan lide pou n simaye nouvèl la alawonnbadè.

Aprè silans Lameri ak MTPTC nan vil Okap ki te dwe fè travay sa. Jèn fanm kou gason tout kategori laj ak pèl, pikwa, bourèt nan men yo nan sousi pou pwoteje anvironman ke y ap viv ladanl lan.

« lè lapli tonbe, li bay anpil pwoblèm », sa se deklarasyon yon demwazèl ki nan ekip la; koulè nwa tèt mare, mayo blan ak yon djin ble sou li epi pèl li nan men l. Li kontinye pou l di « nan sans sa avèk kontribisyon kèk vwazinaj nan zòn nan yo te arive achte dlo epi fè yon ti kotizasyon antre yo ak sa ki gen 50, 100 goud pou yo arive f on espageti pou moun yo k ap travay yo ».

Yon lòt kote jèn gason sila ki gen mayo blan ki ekri nan do l AJDP, yon bout pantalon ak sandal li nan pye l deklare « lide sa yo te genyen l depi yon bon bout tan e yo pa gen okenn otorite k ap rive fè l pou yo, se yo pouki fè l pou zòn nan e n ap sezi wè aprè de (2) mwa Petitans ap vinn bèl ».

Prezidan AJDP a, Carlo JUSMÉ, pa kenbe mo nan bouch li pou l pwouve jan li renmen sa e swete pou travay la kontinye (Pa gen kanpe). Pou li kontinye ak entèvansyon l lan, li fè apèl èd Lameri, Ministè  travo piblik transpò ak kominikasyon (MTPTC), pou vin pran fatra yo pou yo lè yo finn netwaye zòn lan.

Pou yo ka kenbe figi zòn lan epi konbat ak fatra yo prezidan an fè yon gwo pwomès ak moun ki rete ladan l yo a. « apre netwayaj kanal yo, n ap pase de kay an kay pou nou bay sachè pou moun yo ka mete fatra yo e n ap pase pran l chak de (2) fwa pa jou ». Carlo di li ouvri pòt bay tout otorite lokal oubyen dyaspora yo. Se sèl fason pou travay la fèt pi byen e pi rapid. Pou li fini li di se pa eleksyon ki pral genyen men pito se konviksyon yo.

Nap raple w se pa sèlman Petitans ki gen pwoblèm fatra men pito se tout Okap k ap fè fas ak koze sila. Plizyè zòn nan vil la pa janm jwenn prezans MTPTC, tankou Fòsenmichèl, Pon 9, lòt bò Baryè, ak santre vil la (lèt A ak L).

John Clawootson OZERUS